أبو عبدو الحلبي ونهفاته في رمضان – الحلقة الأولى

مع دخول الشهر الكريم رمضان مبارك علينا وعليكم أحب أبو عبدو الحلبي يتحفنا بشوية تفاصيل صارت معه بيومه الأول وخاف يكون أفطر.

أول ما فاق أبو عبدو قبل أذان الضهر بعشر دقائق قال بسم الله وبلش يدعي ربه بالمغفرة وقبول الصيام وهو عم يحرك شفايفه تذكر أنه ما نضف أسنانه بالفرشاة والمعجون.

ومع أنه الشياطين مصفدة برمضان إلا أنه الوساوس الذاتي لأبو عبدو خلاه (ينط ما يحط) وتوضأ ولبس وركض عالجامع ليسأل الشيخ

قبل ما يقيم المؤذن الصلاة استوقف أبو عبدو الامام وسأله ” شيخي أنا نسيتأافرشي سناني بعد ما تسحرت..وأول ما صحيت قعدت اذكر ربي …وكأني يا شيخي حسيت بطعم القمر دين فقس بتمي”

بقى شو قولك يا شيخ أنا فطرت ولا لسى صايم.

تعوذ الشيخ من الشيطان وسمى بالرحمن وجاوبه ” قل اللهم أني صائم”.

وقبل ما يخطي الشيخ باتجاه المحراب وقفه أبو عبدو  وقله ” طيب إذا فطرت بطلع علي كفارة ولا هي تعتبر إفطار غير متعمد وبطلع علي قضاء يوم”

اتبسم الشيخ وقله يا حجي جاوبتك ” قل اللهم إني صائم وكمل يومك” وممكن أنك تفرشي أسنانك بالمياه فقط بلا معجون لتزيل أثار الطعام.

أبو عبدو صفن ومسك الشيخ من عبايته وكرك عليه ” طيب بتنصحني اتسحر شي بدال قمر الدين منشان ما يلزق بدكة سناني”

هون الشيخ طلع عن طوروه وقله يا اخي اشلح (هالدكه) ونضفها وخلصنا وإذا لسا مشتبه أنك افطرت أنا بدفع الكفارة …تركنا نصلي الضهر قبل ما يدخل وقت العصر …”إنا لله وإنا اليه لراجعون”.

فرد عليه أبو عبدو أنا شلحتا و غسلتها  بس بالغلط أخدت دكت أم عبدو …عجب تعتبر بوسة شيخي …